انت ماشي ورا مين ؟

أخي الحبيب / اختي المباركة
سؤال مهم جداً انت ماشي ورا مين ؟
فيه ناس بتمشي ورا الجسد وغرايزه والنهاية بتكون نهايات مؤسفة زي واحد مثلاً يمشي مع ناس وحشين ويعرفوه بناس أوحش منه يتعلم منهم الإدمان أو يعرفوه على بنات بعيدة عن المسيح ويمشي وراء غرايزه وشهواته وساعتها الشيطان يمسك عليه زلة ويمضوه على ورق على بياض وساعتها بيبقى قدام الأمر الواقع وبيسيب المسيح اللي فداه مش علشان ما بيحبش المسيح لكن لأنه مشي وراء غرايز الجسد زي شمشون مثلاً في الكتاب المقدس وداود النبي مرنم اسرائيل الحلو وسليمان الحكيم كلهم وقعوا في فخ غرايز الجسد.
وفيه ناس بتمشي وراء الذات : يعني ايه ؟ يعني ذاته وكبرياؤه وعناده بيخلوه يحس انه أحسن واحد في الناس اللي حواليه وهو فعلاً ممكن يكون عنده شوية جمال زيادة، شوية علم زياده، شوية جاه ،أو سلطة ، أو من عيلة كبيرة شوية ، فبيحتقر الناس اللي حواليه ومش عايز يمشي غير مع الناس اللي من مستواه ( حسب فكره ) وبكده بيخسر ناس كتير من أصحابه اللي من سنه، وده للأسف بيتكل على ذاته فحتى لو حب يخدم ربنا مش بيتكل على نعمة ربنا ، وده يخلي خدمته مالهاش لازمة ولا فيها ثمر ، لأن ربنا بيحب يشغل معاه الناس المتواضعين.
وفيه ناس بتمشي ورا محبة المال، وبسبب حبه للمال يطمع ويكره ويخاصم ويحقد ويحسد ويظلم وممكن يقتل وناس بسبب الفلوس بتقتل ناس من غير ذنب واللي زي ده بيبقى لعبة في إيد الشيطان ويخليه يتذل للي يسوى واللي مايسواش لأنه بيبخل على نفسه وبيبقى مذلول للمال وبيبقى أحبابه واصحابه قليلين لأنه بيخسر اقرب الناس ليه .
وفيه ناس تانية تحب تمسك العصا من النص يعني ساعة لقلبك وساعة لربك، لو لقوا ناس بتصلي مفيش مانع يصلوا معاهم ، ولو لقوا حد بيرنم يرنموا معاهم، ولو لقوا حد بيغني ويرقص مفيش مانع يشاركوه، وتوصل الحكاية معاهم لدرجة إنهم ممكن يشربوا ويسكروا بحجة ساعة لقلبك وساعة لربك ،والنوعية دي ممكن تلاقيهم بيحضروا الكنيسة عادي مفيش مشكلة ، لكن لما بيتعرضوا لأي موقف ممكن بسهولة يسيبوا المسيح ، لأنهم مش ثابتين فيه ومعرفتهم بيه معرفة علشان مصلحتهم الشخصية، أصل ربنا بالنسبة ليهم زي البنك، يروحوا له لو مزنوقين في حاجة ،لكن لو مش عايزين حاجة والحالة تمام خلاص هم في حالهم وربنا في حاله لحد ما تيجي زنقة جديدة، فيضطروا يرجعوا له لحد ما الزنقة تعدي وهكذا
فيه ناس تانية عايشين مع المسيح لكن إرادتهم ضعيفة شوية ، هم بيحبوا ربنا وماشيين معاه بس فيه خطايا غالباهم وبيقعوا فيها ، لكن بيحاربوا الخطية وبيجاهدوا علشان بيحبوا ربنا ومهما وقعوا في الخطية عندهم رجاء في المسيح انه هيديهم النصرة ، فممكن تلاقيهم في حالات غالبين وفي حالات مغلوبين من الخطية واللي زي دول عايزين معونة من ربنا يديهم النصرة على الخطايا دي.
ولكن فيه ناس تانيين حبوا المسيح من كل قلبهم ، وقدروا يغلبوا شهوات العالم ويدوسوا عليها ، وفي حب المسيح نسيوا ذواتهم وماتت الكبرياء عندهم ،لأنهم عارفين انهم من غير المسيح مايسووش حاجة، فبيكرهوا المناصب اللي بتمجد الذات وتزيد الكبرياء، أما من جهة الشهوات الجسدية وملذات العالم ، فعندهم إرادة قوية تغلب الخطية بقوة المسيح ولما ينظروا لجماله بيكرهوا كل حاجة تبعدهم عنه، ودول لما بيخدموا المسيح في أي مكان هيكونوا مؤثرين علشان مفيش للخطية سلطان عليهم
طيب دلوقت عرفنا نوعيات الناس السؤال المهم والخطير دلوقت هو : انت من أي نوع في دول ؟
1- ماشي وراء جسدك وغرايزه 2 - ماشي وراء ذاتك وكبريائك
3- ماشـــــــي وراء محبة المال 4- ساعــة لقلبك وساعـــة لربك
5- إرادتك ضعيفة وبتحارب الخطية 6- بتحب ربنـــا من كـل قلبـــك ملحوظة هامة : كل ما تحب المسيح هتكون آلة سهلة في ايده لتمجيد اسمه القدوس بقوة أكبر وتبقى سبب بركة لناس كتيييييييييييييييير